शीतकालिन ओलिम्पिक्समा दुई कोरियाको मार्च, एउटै झण्डामुनि

उत्तर र दक्षिण कोरियाले शीतकालिन ओलिम्पिक्समा संयुक्त कोरियाको एउटै झण्डा मुनि संगसंगै मार्च गर्न सहमति जनाएका छन्।
उत्तर कोरियाले दक्षिण कोरियामा हुन लागेको शीतकालिन ओलिम्पिक्समा दुईसय तीस जना चिअरलिडर अर्थात खेलाडीलाई हौस्याउनेहरुको टोली पठाउने प्रस्ताव गरेको छ।
उक्त प्रतियोगितामा बाजाबजाउन प्योंगयांगले एकसय चालिसजना वाद्यवादकहरु संलग्न एउटा वाद्य समूह, अर्केष्ट्रा, पठाउने बारे दुई कोरियाबीच यसअघि नै सहमति भैसकेको छ।
उत्तर कोरियाली अधिकारीहरु तथा पत्रकारहरु पनि सहभागी हुने भएका छन् जसबाट उत्तर कोरियाली प्रतिनिधिमण्डलको आकार झन ठूलो हुने भएको छ। उत्तर र दक्षिण कोरियाले आगामी महिना दक्षिणमा हुने शीतकालिन ओलिम्पिक्समा संयुक्त कोरियाको एउटै झण्डा मुनि संगसंगै मार्च गर्न सहमति जनाएका छन्।
आउंदो फेब्रुअरी ९ देखि २७ सम्म दक्षिण कोरियाको प्युअंगचांग शीतकालिन ओलिम्पिक्स हुँदैछ। युद्धविराम गाउँ पाममुनजोममा भएको दुर्लभ वार्तापछि तिनीहरुले आइस हकी खेलको महिला तर्फको प्रतिस्पर्द्धामा संयुक्त टोली प्रस्तुत गर्ने सहमति पनि गरेका छन्।
दुई वर्ष यता दुई कोरियाबीच भएको यो पहिलो उच्चस्तरीय वार्ता हो। दक्षिण कोरियाका हकी प्रशिक्षक र पुरातनवादी समाचारपत्रहरुले संयुक्त हकी टोली प्रस्तुत गर्ने निर्णयप्रति चिन्ता व्यक्त गर्दै त्यस्तो टोलीले पदक जित्न सक्ने दक्षिण कोरियाको अवसरमा नोक्शान पुग्ने बताएका छन्।

Leave a reply

जापानमा सडक दुर्घटनामा नेपालीको मृत्यु

जापान । जापानमा भएको सडक दुर्घटनामा एकजना नेपालीको मृत्यु भएको छ। घटनामा अर्का एक नेपाली पनि गम्भीर घाइते भएका छन्।
घटनामा बागलुङ जिल्लाको बागलुङ नगरपालिका-६ का ३० वर्षीय किरण सापकोटाको मृत्यु भएको छ भने उनीसँगै रहेका गम्भीर घाइतेको विवरण थाहा हुन सकेको छैन।
घटना मंगलबार मध्यरात भएको भएपनि प्रहरीले बुधबार अबेर जानकारी गराएको थियो। दुई वर्षअघि रोजगारीका लागि जापान आएका सापकोटा र घाइते दुवैजना कुक भिसामा थिए। सापकोटा खानाजावा शहरको एक नेपाली रेस्टुरेन्टमा काम गरेर घर फर्कंदै थिए। घाइते भने सापकोटाको नजिकका आफन्त रहेको प्रहरीले जनाएको छ।
टोकियोबाट दक्षिणपश्चिममा पर्ने इसिखावा प्रान्तको नोमी शहरस्थित राइमारु नगरको चुस्यो सडकमा तीव्र गतिमा गुडेकोे नम्बर नखुलेको कारले पछाडिबाट ठक्कर दिएको थियो।
दुईजनाले एउटा साइकल प्रयोग गर्न नपाइने जापानको नियमअनुसार सापकोटाले साइकल डोर्याएर कामबाट कोमाचुस्थित घर जाँदै गर्दा सडक दुर्घटनामा परेको इसिखावाको प्रान्तीय प्रहरीले जानकारी गराएको छ। दुर्घटनालगत्तै उपचारार्थ स्थानीय हान्सोसाकी अस्पतालले सापकोटालाई मृत्यु भएको घोषणा गरेको थियो।
बाक्लो हिमपातका कारण सडकमा हिउँ जमेकाले सहजताका लागि घुमेर राजमार्ग हुँदै घर जाने क्रममा भएको दुर्घटनाबारे प्रहरीले विस्तृत अध्ययन गरिरहेको जनाएको छ। नियन्त्रण गुमाएर दुर्घटनामा परेको कारका चालक र घाइतेको उपचार भइरहेको प्रहरीले जनाएको छ। घटना सम्बन्धमा जापानस्थित कुनै पनि नेपाली समाजले आधिकारिक रुपमा केही बोलेका छैनन्।

सिन्धुपाल्चोक सेवा समाज युएईले ‘सोनाम ल्होछार साँझ’ मनाउँदै

बौद्ध धर्मावलम्बीहरुको पर्व २८५४ खिं ल्हो अर्थात सोनाम ल्होछारको अवसरमा आगामी फेब्रुअरी २ तारिखका दिन सिन्धुपाल्चोक सेवा समाज युएईले ‘ल्होछार सांस्कृतिक साँझ’को आयोजन गर्ने भएको छ ।
कार्यक्रमको मुख्य आकर्षक रहेका ख्यातिप्राप्त राष्ट्रिय कलाकारहरु प्रेम लोप्चन र शशीकला मोक्तान उक्त कार्यक्रमको लागी युएई आउन लागेका छन् । कार्यक्रममा युएईमा रहेका कलाकारहरुको समेत बेजोड प्रस्तुति रहनुका साथै साँस्कृति झल्कने झाँकी प्रदर्शन पनि हुने आयोजकले जानकारी दिएका छन् ।
युएईको देरा(दुबईमा अबस्थित काल्टन टावर होटल)मा आयोजना हुन लागेको सोनाम ल्होछार कार्यक्रम शुक्रबारका दिन दिउँसो २ बजेदेखि बेलुकी ९ः३० बजे सम्म हुने छ । कार्यक्रमको सम्पूर्ण तयारी पूरा भैसकेको आयोजक सिन्धुपाल्चोक सेवा समाज युएईले  जनाएको छ ।
युएईमा रहेका सम्पूर्ण नेपालीहरुलाई उक्त कार्यक्रममा उपस्थित भई कार्यक्रम सफल पारिदिन युएईमा रहेका नेपाली व्यापारीहरु, बुद्धिजीवी तथा समाजसेवीहरु, पत्रकारहरु, कलाकार एवं सुभचिन्तकहरु सबैमा कार्यक्रम आयोजकले अनुरोध गरेको छ ।

फेरि बढ्यो पेट्रोलियम पदार्थको मूल्य, यस्तो छ नयाँ मूल्यदर

काठमाडौँ । नेपाल आयल निगमले अन्तर्राष्ट्रिय बजारअनुसार पेट्रोलियम पदार्थको मूल्य समायोजन गरेको छ।
बुधबार रातिदेखि लागू हुनेगरी निगमले पेट्रोल, डिजल र मट्टितेलको मूल्य समायोजन गरेको हो।
समायोजित मूल्यअनुसार पेट्रोलमा रु एक, डिजल र मट्टितेलमा रु दुई मूल्य बढ्ने निगमका निमित्त कार्यकारी निर्देशक सुशील भट्टराईले जानकारी दिए। मूल्य बढेपछि पेट्रोल रु १०३ र डिजल तथा मट्टितेलको मूल्य रु ८१ कायम भएको छ।
जनवरी १५ मा इण्डियन आयल कर्पोरेशन (आइओसी)ले पठाएको मूल्यका आधारमा मूल्य समायोजन गरिएको हो। प्रत्येक १५ दिनमा पेट्रोल, डिजल र मट्टितेलको मूल्यमात्रै आइओसीले पठाउँछ भने प्रत्येक १ तारिखमा सबै पेट्रोलियम पदार्थको मूल्य पठाउने गर्छ।

स्थानीय तहलाई स्वास्थ्य संस्था हस्तान्तरण

जिल्ला स्वास्थ्य कार्यालय, तेह्रथुमले आफू मातहतका स्वास्थ्य संस्थाहरुलाई सम्बन्धित स्थानीय तहमा हस्तान्तरण गर्न थालेको छ। स्वास्थ्य मन्त्रालयको परिपत्रबमोजिम जिल्लाका छवटै स्थानीय तहमा पुगेर ती स्थानीय तह भित्रका स्वास्थ्य संस्था हस्तान्तरण गर्न थालिएको जिल्ला स्वास्थ्य प्रमुख डा मुक्तिनारायण शाहले बताए।
स्थानीय तहको कार्यसम्पादनको अधिकार निर्धारण भएसँगै स्वतः स्वास्थ्य संस्थाहरु स्थानीय तह मातहतमै गएपनि कार्यालय मातहतका स्वास्थ्य संस्थाका कर्मचारी, जिन्सी तथा पूर्वाधारको अवस्थालगायत सम्पूर्ण अधिकार औपचारिक रुपमै स्थानीय तहलाई हस्तान्तरण गरिएको डा शाहले बताए।
जिल्ला स्वास्थ्य कार्यालयको टोलीले हालै लालीगुराँस नगरपालिका र आठराई गाउँपालिकामा पुगेर त्यस क्षेत्रका स्वास्थ्य संस्था हस्तान्तरण गरिसकेको छ। सो अवसरमा त्यहाँ निर्वाचित जनप्रतिनिधिसँग स्वास्थ्य संस्थाको व्यवस्थापन, हालको अवस्था, समस्या र चुनौतीका सम्बन्धमा छलफलसमेत भएको छ।
स्थानीय तह मातहतमा गएपछि ती स्वास्थ्य संस्थाको औषधि खरिद, कर्मचारीका सेवासुविधा, पूर्वाधार तथा कार्यालय व्यवस्थापनलगायत सम्पूर्ण काम अब स्थानीय तहले नै गर्नेछन्। दुई नगरपालिका र चार गाउँपालिका रहेको जिल्लामा स्वास्थ्य कार्यालय मातहत दुई प्राथमिक स्वास्थ्य केन्द्र, २९ वटा स्वास्थ्य चौकी र एउटा शहरी स्वास्थ्य केन्द्र छन्।
त्यसमध्ये दुई प्राथमिक स्वास्थ्य केन्द्र र १० वटा स्वास्थ्य चौकी सम्बन्धित स्थानीय तहको जिम्मा लगाइसकेको कार्यालयले जनाएको छ। बाँकी रहेकामध्ये छथर क्षेत्रका पाँचवटा स्वास्थ्य चौकी गाउँपालिकालाई हस्तान्तरण गर्ने तयारी रहेको डा शाहले बताए। अन्य स्वास्थ्य संस्थाहरु पनि अब क्रमशः स्थानीय तहलाई हस्तान्तरण गरिने कार्यालयको तयारी छ। 

धनकुटामा अनिश्चितकालीन कर्फ्यू आदेश जारी

धनकुटा। १ नम्बर प्रदेशको राजधानी धनकुटामा हुनुपर्ने मागसहित सुरु भएको आन्दोलनले उग्र रुप लिएपछि धनकुटामा अनिश्चितकालीन कर्फ्यू आदेश जारी गरिएको छ । आन्दोलनका क्रममा आज बिहान ३ जना घाइते भएका थिए । लगत्तै प्रहरी र प्रदर्शनकारीबीच ढुंगा हानाहान सुरु भएपछि प्रशासनले कर्फ्यू आदेश जारी गरेको हो ।
प्रदेश नं. १ को राजधानी धनकुटा हुनु पर्ने मागसहित सुरु भएको आन्दोलनले बिहीबार उग्र रुप लिएपछि अनिश्चितकालिन कर्फ्यू आदेश जारी गरिएको हो । जिल्ला प्रशासन कार्यालयले अनिश्चितकालीन कर्फ्यू आदेश जारी गरेको जिल्ला प्रहरी कार्यालय, धनकुटाका प्रमुख एसपी सुदिपराज भण्डारीले बताए ।
पश्चिममा घुमाउने चौतारा, उत्तरमा देब्रेवास र दक्षिणमा पातले खोलासम्म कर्फ्यू लगाइएको हो । अहिले पनि आन्दोलनकारी र प्रहरीबीच अहिले ढुंगा हानाहान भइरहेको छ । स्थितिलाई नियन्त्रणमा लिन प्रहरीले दर्जनौं सेल अश्रु ग्यास प्रहार गरेको छ भने लाठी चार्ज समेत गरिएको छ ।

सिडिओले भने ‘आन्दोलन हिंसात्मक नहोस्’, सांसदले उल्टै भने ‘जे पनि हुन सक्छ’

धनकुटा। अस्थायी राजधानी धनकुटा नभएपछि धनकुटाका निर्वाचित सांसद पनि आन्दोलनमा उत्रिएका छन् । आन्दोलनमा सडकमा आएका सांसदले आफूलाई ‘जे पनि हुन सक्ने’ चेतावनी दिएका छन् । प्रमुख जिल्ला अधिकारी प्रेमप्रकाश उप्रेतीले आफूले सांसदलाई आन्दोलन हिंसात्मक नहोस् भन्दा यस्तो जवाफ पाएको बताए ।
आन्दोलन हिंसात्मक हुन थालेपछि अहिले धनकुटामा निषेधाज्ञा जारी गरिएको छ । प्रर्दशनकारीले सरकारी कार्यालय तोडफोड र आगजनी गर्न थालेपछि प्रशासनले निषेधाज्ञा जारी गरेको हो । प्रमुख जिल्ला अधिकारी प्रेमप्रकाश उप्रेतीका अनुसार धनकुटा बजारमा सरकारी कार्यालय रहेका आसपासका क्षेत्रमा समूहमा हिँड्न समेत नपाइने गरी अनिश्चितकालीन निषेधाज्ञा जारी गरिएको हो